ANDHERA AAKHIR KAB TAK ???

App Pakistan kay kisi bhi gaon ya sheher mai chale jain, app ko log  sardiyon mai andhere mai bethe dikhayi denge, aur garmiyon mai hath se pankha jhaltay nazar ayen gey... kya yeh humari aur humaray mulk ki bad naseebi nahi ???

Yahan mai Bangladesh kay ek aisey bachay ki misaal deti hon jis ki raaten siyaah hoti theen, aur raaton ki yeh siyahi ilm aur is k darmiyaan haael ho rahi theen, yeh ek zaheen bacha tha jo apne mulk ka naam puri duniya mai mashoor karna chahta tha, lekin bad kismati se is k gaon mai bijli nahi the, shaam hotey hi pura gaon andherey mai doob jata, lekin pher is bachay ki zindagi mai inqelaab ata hai, or yeh inqelaab Dr. Yonus ki ejaab ''GRAMEEN SHAKTI'' the. Grameen Shakti ne tawanayi k panel banaye aur Bangladesh kay dehaaton mai ye panel asaan qiston par faraham kye jane lage, bachay ne jaise he is khabar ko suna, Dr. Yonus se rabta kya aur pher is ke ghar mai bhi Solar panel laga diya gaya, bachay ke ghar mai roshni agayi, abb bacha raat k waqt ko bhi istemaal karne laga, pharhne laga, board ke imtehan mai top kar gaya, aur ajj medical college ka talib e ilm hai, aur Bangladesh mai is jaise hazaron talib e ilm mujood hain, Grameen Shakti ik behtareen mansoba thi, jis ne Bangladesh ki taqdeer ko badal ke rakh dya, ke jis mulk mae kabhi andhera he andhera tha wo ajj roshni ki nemat se aisa fehaizyaab howa ke Bangladeshi awaam ki tamam tar mushkilaat hal hogayin, bachon ko taleem hasil kar k agey bharhne ke mawaqey mil gayae, Grameen Shakti ki factory mai har maheeney dus hazzar Solar panel banaye jatey hain, jis se ek laakh logon ko rozgaar mil raha hai, is munfarid mansobay ne puri duniya ko heraan kar dya hai, aur yeh ik aisa mansoba tha jo ik shaks ney akeley hi takhleeq kya.

Abb bat kartey hain apne mulk Pakistan ki, hum 19 crore awaam, humarey taleemi edaray bhi chal rahay hain, humare mulk ki engineering universities har saal hazaron ki tadaad mai engineers tayaar karti hain, lekin is sub k bawajood humaray mulk mai 6 se 7 hazaar mega watt ka short fall hai, hum moon soon mai barishon aur baki 8 maheeno mai khusk saali ka shikaar hotey hain, lekin pher bhi hum apney lye kuch nahi kartey, hum bs rotey rehte hain ke humaray mulk mai bijli nahi hai, yaa pher hum hukumranon ko kostay rehte hain, arey jab in zalim hukumranon ko hum awaam or mulk ki koi fiker hi nahi hai, tu hum khud agey bharh kar apney liye kuch kyun nahi kartay??? Agar Bangladesh ka ek shakhs akela hi lakhon logon ka muqaddar badal sakta hai, Dr. Yonus ka ejaad karda Grameen Shakti mansooba Bangladesh mai rehne waley logon ki andhery raaton mai ujala kar sakta hai, tu hum bhi 19 crore logon mai se Dr.Yonus jaise doo, chaar log daryaaft kar saktey hain, aur mulk mai darpaish masaail ko hal kar saktey hain, is ke lye bas masbat soch ki, khud apne qadamon ko agey bharhaney ki aur ALLAH ki zaat se pur umeed rehne ki.....